Европската централна банка го продолжи рокот за пристап до ликвидни евра на Народна банка

На барање на Народната банка, Европската централна банка (ЕЦБ) ја продолжи можноста за пристап до репо-линијата во непроменет максимален износ од 400 милиони евра до 31 јануари 2027 година.

Покрај нејзините девизни резерви, коишто се на историски највисоко ниво од 5 милијарди евра, репо-линијата обезбедува брза достапност до девизна ликвидност што ѝ овозможува на Народната банка флексибилно да се справи со потенцијалните регионални шокови за финансирање и зголемената побарувачка на ликвидност во евра, информираат од Народната банка.
Можноста за пристап до репо-линијата, според Народната банка, обезбедува значителна поддршка за политиките на стабилност коишто таа ги спроведува.

Народната банка доби можност за пристап до репо-линијата на почетокот на кризата предизвикана од пандемијата на ковид-19, во 2020 година, кога ЕЦБ им дозволи пристап до овој инструмент на централните банки надвор од еврозоната, со цел да се спречат преносните ефекти врз финансиските пазари и економиите во еврозоната и да се ублажат негативните ефекти од пандемијата.

- Advertisement -

Во изминатиот период, посочуваат од Банката, и покрај повеќе последователни кризи, не беа користени средства од репо-линијата.