Претседателката на Европската комисија, Урсула фон дер Лајен, денеска остро го опиша рускиот претседател Владимир Путин како „предатор“, нагласувајќи дека Европа мора сериозно да инвестира во сопствената одбрана за да обезбеди мир и стабилност.
– Тој е предатор. Од искуство знаеме дека може да се држи под контрола само со силно одвраќање. Мораме да го задржиме чувството на итност бидејќи знаеме дека Путин не се променил и дека нема да се промени – изјави фон дер Лајен за време на посетата на полско-белоруската граница, каде беше придружувана од полскиот премиер Доналд Туск.
Фон дер Лајен во моментов се наоѓа на турнеја низ седум држави од источна Европа кои се на „првата линија на фронтот“ во односите со Русија, со цел да ги увери во полната поддршка на Европската унија. Нејзината посета на границата меѓу Полска и Белорусија се случи и покрај предупредувањата дека таму се распоредени вооружени белоруски војници.
По Полска, претседателката на Европската комисија попладнево пристигна во Бугарија, каде што беше пречекана од бугарскиот премиер Росен Жељазков.
