Ердоган откри каде отидоа 300 милијарди долари

Турскиот претседател Реџеп Тајип Ердоган изјави дека Турција инвестирала 300 милијарди долари во транспортни проекти, што ја прави земјата клучен геостратегиски центар.

Говорејќи на Глобалниот форум за транспортна поврзаност што се одржува во Истанбул, Ердоган прецизираше дека од вкупните инвестиции, 177 милијарди долари се вложени во патниот сообраќај, 64 милијарди во железничката инфраструктура, 25 милијарди во авијацијата, четири милијарди во поморскиот транспорт и 25 милијарди во телекомуникациите. Овие инвестиции придонеле за економски раст од 1,064 трилиони долари и создавање нови работни места.

– Поврзавме 77 окрузи со патишта, изградивме над 30.000 километри патишта, должината на тунелите порасна од 50 на 790 километри, а на мостовите од 311 на 799 километри – рече Ердоган.

- Advertisement -

Турција сега има 2.251 километар железнички линии за брзи возови и 11.668 километри обновена железничка мрежа. Бројот на аеродроми се зголемил од 26 на 58, а дестинациите достапни од Турција од 60 на 353. Истанбулскиот аеродром за пет години опслужил 32 милиони патници.

Ердоган го истакна и учеството на Турција во обновата на „Патот на свилата“ преку „Средниот коридор“, кој е двојно побрз од поморскиот и четири пати поевтин од воздушниот транспорт. Проектите со Кина за овој коридор ќе создадат 144.000 работни места.

Ердоган нагласи дека Турција нуди пристап до 67 земји и 1,5 милијарди луѓе со четиричасовен лет, а економскиот потенцијал во регионот надминува 51 трилион долари. Форумот, на кој присуствуваа претставници од 70 земји, е можност за промоција на турската транспортна визија и зајакнување на соработката во дигитализацијата и транзитот на стоки.