Џејмс ван дер Бек (48) подготви изненадување за обожавателите на серијата „Досонс крик“ која се емитуваше од 1998 до 2003 година, кога преку видеоповик се појави на добротворниот настан на кој повторно се обедини екипата актери, ѕвезди на хит-серијата.
Глумецот, само ден претходно објави дека мора да го откаже своето присуство на читањето во живо на пилот-епизодата – кое се одржа во Њујорк во добротворни цели за заболените од рак.
– Со нетрпение ја очекував оваа ноќ со месеци и месеци. Не ми се верува дека не сум таму. Не можам да верувам дека нема да ги видам моите колеги од екипата, мојата прекрасна екипа лично… А, само сакам да застанам на таа сцена и да им се заблагодарам на сите во театарот што се тука вечерва. Од глумците од екипата, до сите што прават нешто за ова и се толку дарежливи, а особено на секого од вас – вие сте најдобрите обожаватели на светот – рекол Ван дер Бек.
Улогата на „Досон“ „ја одглуми“, т.е. ја прочита Лин-Мануел Миранда. На собирот се појавија другите ѕвезди на ТВ-серијата: Мишел Вилијамс, Кејти Холмс, Џошуа Џексон, Мери Бет Пејл, Џон Весли Шип, Мери-Маргарет Хјумс, Нина Репета, Кер Смит, Мередит Монро и Бази Филипс. А пак, Џејсон Мур, кој режираше три епизоди од тинејџерската ТВ-драма, е режисер и на овој добротворен повторен собир.
Ван Дер Бек сподели дека има замена за вечерта…
– Имам замена. Смешно преквалификувана замена која би била број 1 на мојата листа на желби (не сонував дека некогаш ќе биде достапен). Некој кого моите деца дефинитивно би го перцепирале како подобар од мене… Плус, тој веќе знае како да стигне до театарот. Значи, тоа е погодно. Улогата на „Досон“, која обично ја игра Џејмс Ван Дер Бек, ќе ја игра Лин-Мануел Миранда. Не можам да верувам дека едноставно морав да го напишам тоа – рекол актерот.
Американскиот актер, инаку, лани објави дека боледува и дека ќе се лекува од рак на дебелото црево во трет стадиум. На претставата присуствуваше и сопругата, Кимберли ван дер Бек.
