Единаесет лица, меѓу кои инженери и директори на градежната компанија задолжена за реновирање, се уапсени под сомнение дека дозволиле употреба на мрежи и полиуретански панели што го разгореле пожарот во комплексот Ванг Фук Корт во Хонг Конг, каде загинаа најмалку 151 лице, а десетици се водат како исчезнати, јави South China Morning Post.
Истрагата на локалните власти покажала дека мрежата што ги покривала скелињата не ги исполнувала противпожарните стандарди. Првите тестови изгледале во ред, меѓутоа понатамошните анализи на 20 примероци откриле дека седум не ги исполнуваат безбедносните норми.
– Сакаа само да заработат на животите на луѓето – изјави шефот на администрацијата на Хонг Конг, Ерик Чан, објаснувајќи дека изведувачите намерно користеле запаливи панели за да го намалат трошокот.
Секретарот за безбедност, Крис Танг, нагласи дека првичната истрага била отежната бидејќи делови од зградите биле недостапни поради ризик од уривање. Пожарот започнал на долниот дел од мрежата, потоа брзо се проширил во внатрешноста и зафатил седум од осум станбени кули, потпомогнат од силниот ветер.
Во комплексот живееле околу 4.600 луѓе. Само една кула останала недопрена. Владата на Хонг Конг обезбеди средства за обнова на домовите, долгорочна поддршка за погодените семејства и субвенции за сместување и погребни трошоци.
Претходно, експерти и безбедносни набљудувачи проценија дека бамбусовите скелиња околу облакодерите, традиција во Хонг Конг, може да го забрзале ширењето на огнот. Токму скелињата биле обвиени со проблематичната зелена мрежа.
Уште во 2025 година, властите на Хонг Конг веќе најавиле постепено исфрлање на бамбусовите скелиња од јавните градежни проекти и нивна замена со метални конструкции.
