Двесте војници на Националната гарда на САД ќе бидат распоредени во Портланд, Орегон

Двесте војници на Националната гарда на САД ќе бидат распоредени во Портланд, Орегон, објави денеска Пентагон.

Војниците „ќе бидат повикани да служат на федерално ниво во период од 60 дена, за да ги заштитат службениците за имиграција и за царинска контрола на САД и другиот персонал што извршува федерални задачи“, изјави портпаролот на Пентагон, Шон Парнел, во соопштение.

Доналд Трамп, кој веќе распореди војници во градови управувани од демократите како што се Лос Анџелес, Вашингтон и Мемфис, се закани претходно овој месец дека ќе ја испрати Националната гарда во Портланд, каде што протестите против имиграциската полиција се одржуваат веќе неколку месеци. Тој одобри „употреба на максимална сила доколку е потребно“.

- Advertisement -

Државните службеници на Орегон вчера поднесоа тужба за да ја блокираат наредбата, тврдејќи дека одлуката е „мотивирана од желбата на Трамп користењето војска за рутински активности за спроведување на законот да стане вообичаена пракса, особено во градовите управувани од неговите политички противници“.

Во својата жалба, државните службеници на Орегон, исто така, тврдат дека нема потреба од распоредување на Националната гарда во Портланд, бидејќи протестите против имиграциската полиција таму беа мирни и ограничени по обем, спротивно на тврдењата на Трамп.

Американскиот претседател ја направи борбата против нелегалната имиграција апсолутен приоритет, зборувајќи за „инвазија“ на САД од страна на „криминалци од странство“ и широко застапувајќи ја депортацијата на мигрантите, за што имиграциската полиција е една од неговите главни алатки.