ДВАЈЦА СКОКАЧИ ПО КРСТОТ ЗАВРШИЈА ВО БОЛНИЦАТА 8. СЕПТЕМВРИ

Топ Вести - Слушај сега

Двајца верници, кои скокнаа во реката Вардар за да го фатат крстот на денешното одбележување на празникот Водици во Скопје, завршија во болницата 8-ми Септември поради премрзнување. Едниот имал 20, а другиот 26 години. Според информациите од болнички извори, нивната состојба е стабилна, објави Сител.

- Advertisement -

За фаќање на крстот во Скопје годинава беа пријавени 160 верници, а околу 140 влегоа во водите на Вардар. Да се плива во надојдениот Вардар денеска не беше нималку лесно. Брзата и студена вода го отежна излегувањето на некои од пливачите на кејот. На некои им беше потребна помош од екипите на Црвениот крст.

Настанот привлече илјадници граѓани – значително повеќе од лани. Преполни беа сите околни мостови и кејот, а Скопје уште еднаш покажа дека традицијата на Богојавление не е само религиозен чин, туку и силен симбол на заедништво, храброст и вера.

Оваа година 24-годишниот Дарко Митровиќ од Центар го фати светиот крст во водите на Вардар во Скопје. Тој најбрзо исплива меѓу сите пријавени кои скокнаа од кејот, по што доби подароци.