Досега се откупени 24.000 тони тутун, а просечната цена е 399,87 денари

Досега се откупени 24.000 тони тутун, а просечната цена е 399,87 денари, рече денеска министерот за земјоделство, шумарство и водостопанство Цветан Трипуновски.

По средбата со земјоделците во Битола, Трипуновски, одговорајќи на новинарски прашања, истакна дека е задоволен од откупот, како и дека веднаш по завршувањето на законскиот рок за преземање на количините треба да почне подготовката за следната реколта.

-Наближуваме до крајот на законскиот рок за откуп на тутунот. Досега се откупени 24 милиони килограми, а просечната цена е 399,87 денари или речиси 400 денари, а со субвенцијата што ќе ја исплатиме ќе заокружиме 500 денари. Она што е откупено и исплатено е речиси 98%. По завршување на откупниот рок ќе се исплатат субвенциите. Задоволен сум како течеше откупот и мислам дека веднаш по неговото завршување ќе треба да се подготвуваме за идната сезона – нагласи министерот.

- Advertisement -

Тој очекува земјоделците да ги користат субвенциите за зголемување и унапредување на производството. .

-За една година не можеме да направиме радикален рез во субвенционирањето, годинава почнуваме реформа во овој сегмент, но ќе продолжиме и во 2026 година. Парите што ги даваме како држава треба да имаат сериозен ефект во делот не само на враќање на производството, туку и на негово поттикнување да оди во нагорна линија, за домашна употреба или за извоз. Очекувам земјоделците да ги употребат субвенциите за производство и за обнова, за вистинската намена за која ги добиле – рече тој.

Трипуновски најави и засилени инспекциските контроли кои треба да ги спречат злоупотребите на субвенциите.

–  Со сите контроли кои годинава ќе бидат засилени, ќе ги елиминираме сите злоупотреби. Лани откривме многу корисници на субвенции кои не се вистински земјоделци, годинава Инспекторатот за земјоделство ќе го ставиме на располагање на Платежната агенција со што ќе се зголеми бројот на контроли. Парите мора да завршуваат кај вистинските земјоделци – подвлече Трипуновски.

Тој и порача на раководителите на сите подрачни единици, дека политиките на Министерството мора да стигнат до секој земјоделец.