Данска и САД ќе се договорат, Русија не е засегната од ситуацијата

Топ Вести - Слушај сега

Ситуацијата околу Гренланд не ја засега Русија, изјави рускиот претседател Владимир Путин.

- Advertisement -

– Тоа што се случува со Гренланд воопшто не нè засега – рече Путин за време на оперативно советување со постојаните членки на Советот за безбедност на Русија.

Според рускиот претседател, САД и Данска ќе најдат заедничко решение.

– Патем, Данска секогаш се однесувала кон Гренланд како кон колонија, доста строго, ако не и сурово. Но, тоа веќе е сосема друго прашање, тешко дека сега некого го интересира тоа – рече Путин.

Според него, САД „можат да си дозволат да го купат“ Гренланд, доколку тој се продаваше по цени споредливи со оние по кои Русија им ја продала Алјаска на Американците во 19. век. Рускиот претседател рече дека според неговите пресметки, сумата за купување на Гренланд би можела да изнесува помеѓу 200 милиони и 1 милијарда долари.

– Површината на Гренланд е малку поголема (од површината на Алјаска), според мене е еднаква на 2,166 милиони квадратни километри… Односно разликата е приближно 450.000 квадратни километри. Па, ако го споредиме тоа со вредноста на стекнувањето на Алјаска од страна на САД, тогаш цената за Гренланд би била некаде околу 200-250 милиони долари. Ако ги земеме предвид тогашните цени на златото, таа бројка би била поголема, веројатно околу милијарда. Но, мислам дека САД ќе можат да си ја дозволат и таа сума – додаде шефот на руската држава.

Путин го коментираше и мировниот процес во Појасот Газа.

– Најважно е целиот процес позитивно да се одрази врз долгорочното решавање на палестинско-израелскиот конфликт врз основа на соодветните одлуки на ОН. Неопходно е да бидат земени предвид неотуѓивите потреби и желби на Палестинците – нагласи рускиот претседател Путин.