Четворица мртви во престрелка меѓу глисер од Флорида и кубанската крајбрежна стража

Топ Вести - Слушај сега

Најмалку четири лица загинаа, а шест се повредени во оружан инцидент што се случил во територијалните води на Куба, кога глисер кој пристигнал од Флорида отворил оган кон брод на кубанската крајбрежна стража, по што следувала возвратна престрелка.

- Advertisement -

Според соопштението на кубанското Министерство за надворешни работи, загинатите биле членови на екипажот на глисерот, додека шест патници се здобиле со повреди. Во инцидентот бил ранет и командантот на кубанската гранична патрола.

Престрелката се случила на околу една наутичка милја од каналот Ел Пино, во провинцијата Вила Клара, откако припадници на кубанската крајбрежна стража му се приближиле на глисерот со цел да извршат идентификација. Кубанските власти не ја соопштија националноста на настраданите, но потврдија дека е отворена истрага за целосно расчистување на случајот.

Инцидентот доаѓа во период на зголемени тензии меѓу Соединетите Американски Држави и Хавана, особено поради нафтеното ембарго и блокадата на испораките на нафта од Венецуела – долгогодишен сојузник на Куба. Овие мерки дополнително ја продлабочија енергетската и хуманитарната криза на островот.

Американскиот министер за надворешни работи Марко Рубио се огласи за време на посетата на карипската држава Свети Кристофер и Невис. Различни делови на американската влада работат на собирање и проверка на информации, изјави тој пред новинарите. Додека не се утврдат повеќе детали, Рубио не сака да шпекулира за случувањата.

„Доволно е да се каже дека е многу необично да се видат вакви престрелки на отворено море“, рече американскиот министер. Нешто вакво со Куба не се случило многу долго време. Според Рубио, не се вклучени американски службеници.

Американската амбасада во Хавана сè уште се обидува да утврди дали жртвите биле американски државјани или лица со постојан престој во САД, рече министерот. Моментално, поголемиот дел од информациите што ги имаат САД доаѓаат од кубанските власти. Според нив, чамецот бил регистриран во американската сојузна држава Флорида. САД го испитуваат тоа.

Државниот обвинител на Флорида, Џејмс Утмајер, најави истрага од страна на локалните органи на редот, нагласувајќи дека „кубанската влада не може да се смета за доверлив партнер“.

Инцидентот го коментираше портпаролката на руското министерство за надворешни работи Марија Захарова.

– Ова е агресивна провокација од САД со цел да се ескалира ситуацијата и да се предизвика конфликт – изјави Захарова за државната новинска агенција ТАСС.

Од кубанското Министерство за надворешни работи порачаа дека земјата е решена да ги заштити своите територијални води и својот суверенитет, алудирајќи токму на актуелните геополитички притисоци.