Бројот на загинати во Мјанмар по вчерашниот разорен земјотрес со интензитет од 7,7 степени по Рихтеровата скала се искачи на 1.002, повредени се 2.376 луѓе, а 30 се водат како исчезнати

Бројот на загинати во Мјанмар по вчерашниот разорен земјотрес со интензитет од 7,7 степени по Рихтеровата скала се искачи на 1.002, повредени се 2.376 луѓе, а 30 се водат како исчезнати, објавија денеска државните медиуми во земјата.

„Оштетени се инфраструктурни објекти како патишта, мостови и згради, што резултираше со цивилни жртви и повредени. Во тек се операции за пребарување и спасување во погодените области“, се наведува во соопштението на хунтата во Мјанмар.

Водачот на хунтата Мин Аунг Хлаинг нареди итни спасувачки напори во погодените области. Вчера тој ја покани „која било земја“ да обезбеди помош и донации.

- Advertisement -

Кинески спасувачки тим денеска пристигна во Мјанмар, додека Русија и САД понудија помош во катастрофата.

Според симулацијата на Геолошкиот институт на САД бројот на загинати може да надмине 10.000 луѓе во Мјанмар, а загубите би можеле да бидат поголеми од вредноста на бруто домашниот производ на земјата.

Во земјотресот се оштетени стотици згради и во соседен Тајланд.