Брод нападнат во Црното Море во близина на турскиот брег

Турција соопшти дека брод што превезувал сончогледово масло од Русија до Грузија бил нападнат денес во Црното Море во близина на нејзиниот брег. Нема повредени или штети кај 13-те членови на екипажот, а бродот „Мидволга-2“ дури и не побарал помош, објавија странските новински агенции од Анкара.

Генералниот директорат за поморски работи при турското Министерство за транспорт, исто така, објави на социјалната мрежа X дека бродот бил цел на напад „80 наутички милји од турскиот брег“ и дека сега плови кон турското пристаниште Синоп со вклучени мотори.

Инцидентот се случи неколку дена откако украинските медиуми објавија дека танкери биле погодени од беспилотни летала во Црното Море во близина на турскиот брег. Украински безбедносен извор ја презеде одговорноста за нападите, според француската новинска агенција АФП, објаснувајќи дека беспилотните летала погодиле бродови што тајно транспортираат руска нафта.

- Advertisement -

Турското Министерство за транспорт го пријави првиот напад во петокот, кога експлозии одекнаа на два брода покрај турскиот брег, а потоа во саботата, кога друг брод беше цел, според италијанската новинска агенција Анса.

Турскиот претседател Реџеп Таип Ердоган во понеделник ги осуди извештаите на украинските медиуми за нападите со украински беспилотни летала врз танкери за нафта во Црното Море кои беа на пат кон Русија како загрижувачка ескалација.

„Под никакви околности не можеме да ги прифатиме овие напади што ја загрозуваат безбедноста на пловидбата, животната средина и животот во нашата ексклузивна економска зона“, нагласи тој. Тој оцени дека „конфликтот меѓу Украина и Русија јасно достигна фаза каде што ја загрозува безбедноста на пловидбата во Црното Море“.