Богојавление – Водици 2026 во Копер: Охриѓанецот Климчо Групчев го извлече светиот Крст од Јадранското море (ВИДЕО)

Топ Вести - Слушај сега

Копер, Словенија – Со верба, радост и длабока духовна посветеност, вчера во приморскиот град Копер се одбележа еден од најголемите христијански празници – Богојавление, познато и како Водици. Светата литургија и обредот на осветување на водите се одржаа на брегот на Јадранското море, каде што се собраа бројни верници од Словенија и соседните земји.

Митрополит Пимен ја предводеше светата литургија

- Advertisement -

На овој значаен црковно-народен собир чиноначалствуваше Митрополит Европски господин Пимен, кој ја предводеше светата литургија и го изврши традиционалниот обред на осветување на водите. Со благослов и молитва, Митрополитот го фрли чесниот Крст во студените морски води на Јадранот, по што храбри верници се фрлија во морето за да го извлечат.

Охриѓанец од Месокастро ја оствари својата желба

Најсреќен меѓу сите присутни беше Климчо Групчевски, охриѓанец од Месокастро кој живее и работи во Порденоне, Италија. По три години континуирано учество во обредот, Климчо конечно ја оствари својата желба – успеа да го извлече светиот Крст од студеното Јадранско море!

Радоста на младиот Македонец беше видлива на неговото лице, а верниците го поздравуваа со аплауз и благослови. Според традицијата, извлекувањето на чесниот Крст носи среќа, здравје и божји благослов за цела година.

Традиција што ги обединува верниците

Празникот Богојавление ја одбележува традицијата на крштевањето на Исус Христос во реката Јордан од страна на Јован Крстител. Обредот на фрлање и извлекување на Крстот од водата е длабоко вкоренет во православната традиција и претставува симбол на духовно очистување и обновување.

Овогодинешното празнување во Копер повторно покажа колку силна е верата и заедништвото меѓу православните верници од дијаспората, кои и покрај студеното времето и ниските температури на морето, со ентузијазам учествуваа во светиот обред.

Честитки за Климчо

“Честитки, Климчо, за многу години!”, одекнуваа пораките од присутните верници по неговиот успех. Неговата истрајност и вера се инспирација за сите кои учествуваат во овој традиционален обред.

Празникот Водици во Копер повторно ги обедини Македонците и православните верници во Словенија и пошироко, потсетувајќи на важноста на традицијата, верата и заедништвото во дијаспората.

Среќен празник Водици и божји благослов за сите верници!

С.Денесовски