Американскиот сенатор Марквејн Малин изјави дека САД му понудиле на венецуелскиот претседател Николас Мадуро можност да ја напушти земјата и да замине во Русија или друга држава.
– Му дадовме можност на Мадуро да замине. Му рековме дека може да оди во Русија или може да оди во друга земја – изјави републиканскиот сенатор од Оклахома, пренесува „Ројтерс“.
Изјавата доаѓа во момент кога САД распоредуваат воени сили долж брегот на Венецуела. Претседателот Доналд Трамп нареди распоредување на носачи на авиони и воена флота во Карипското Море и предупреди дека американската армија го смета венецуелскиот воздушен простор за затворен.
Трамп ја оправда операцијата со тврдења дека Каракас стои зад трговијата со дрога што го преплавува американскиот пазар. Мадуро возврати дека Вашингтон го користи тоа како изговор за промена на режимот и заплена на нафтените резерви.
Притоа, шефот на САД нагласи дека нема да толерира, како што рече, „нарко-држава во задниот двор на Америка“. Според неговите зборови, ова е дел од „операција за стабилизација и безбедност“ во западната хемисфера.
Социјалистичкиот лидер Мадуро, кој е на власт од 2013 година, е реизбран во 2024 година по спорни избори обележани со насилства и апсења.
– Самиот венецуелски народ исто така се изјасни и рече дека сака нов лидер и да ја обнови Венецуела како земја – додаде Малин.
Сличен став изнесе и сенаторот Линдзи Греам.
„Повеќе од една деценија, Мадуро контролира нарко-терористичка држава која ја труе Америка“, напиша Греам на платформата Икс, нарекувајќи го венецуелскиот претседател нелегитимен.
Тој ја пофали „цврстата посветеност“ на Трамп „да стави крај на лудилото во Венецуела“, уверувајќи дека тоа ќе спаси американски животи и ќе им даде нова шанса на Венецуелците.
Од почетокот на септември, американската морнарица извела напади врз повеќе од дваесет бродови осомничени за трговија со дрога во Карипското и Тихиот Океан. Според Обединетите нации, во тие операции загинале 83 лица, што организацијата ги оцени како „вонсудски егзекуции“.
Исто така, „Њујорк тајмс“ откри дека Доналд Трамп и Николас Мадуро неодамна имале телефонски разговор за можна средба во САД, што подоцна го потврди и самиот американски претседател, без да даде дополнителни детали за содржината на разговорот, јави „Њујорк тајмс“.
