Американската војска повеќе нема да прифаќа трансродови лица и ќе престане да им помага во процедурите за промена на полот на своите членови, се вели во писмото, доставено до судот од министерот за одбрана, Пит Хегсет.
„Со примена веднаш, се става пауза на сите нови приеми на лица со историја на родова дисфорија. Сите непланирани, закажани или планирани медицински процедури, поврзани со промена на полот, за воените членови се паузирани“, се вели во писмото на Хегсет, поднесено во Окружниот суд во Вашингтон.
Анкетата на Галуп, објавена во понеделникот, покажа дека 58% од Американците се за слобода на трансродовите луѓе да служат во војска, но таа поддршка е намалена од 71% во 2019 година.
Претседателот на САД, Доналд Трамп, минатиот месец потпиша извршна наредба со која директно ги критикува трансродовите војници, со нагласок дека мажот, кој се идентификува како жена, е „неконзистентен со понизноста и со несебичноста што се бара од војник“.
