Американскиот државен секретар Марко Рубио предупреди на стратешкото значење на Гренланд во контекст на зголемената глобална конкуренција за контрола на арктичките бродски рути и на енергетските ресурси.
Во интервју за „Мегин Кели шоу“, Рубио истакна дека Арктикот брзо станува клучна точка за глобалната трговија и за производството на енергија, што, исто така, може да стане предмет на глобален политички конфликт.
Рубио изјави дека како што мразот на Арктикот се намалува, морските патишта стануваат сè подобри за пловидба, што создава нов стратешки предизвик.
– Амбициите на Кина на Арктикот стануваат сè поочигледни. Тие не се арктичка сила, немаат присуство во тој регион, но, би можеле да се обидат да создадат воена инфраструктура на Гренланд, исто како што направија во Панамскиот Канал – рече Рубио.
Според него, доколку Кина се обиде да воспостави воено присуство на Гренланд, тоа би можело да претставува сериозен предизвик за националната безбедност на САД.
– САД веќе имаат безбедносен договор со Данска што се однесува на Гренланд, но, ако ситуацијата се влоши, се поставува прашањето: дали треба да преземеме поголема контрола врз тој регион – посочи Рубио.
Рубио нагласи дека пристапот на претседателот Доналд Трамп е „директен и искрен“ и дека таквите разговори треба да се водат на соодветни форуми.
– Ова не е прашање на откуп на земјиште, туку на наши национални интереси и ние мора да го решиме – заклучи Рубио.
