Земјоделските култури, особено овошните насади, повторно се под ризик од ниските температури што се очекуваат од недела

Земјоделските култури, особено овошните насади, повторно се под ризик од ниските температури што се очекуваат од недела, предупредуваат агрометеоролозите од УХМР. Мразот може да предизвика штети, особено кај видовите што веќе процветале.

Истовремено, врнежите што ја зафатија земјава се од големо значење за земјоделството. Тие ја зголемуваат влагата во почвата потребна за пролетната подготовка на садењата, а позитивно влијаат и врз есенската пченица. Сепак, агрометеоролозите предупредуваат дека високата релативна влажност може да создаде услови за развој на болести и штетници.

„За стрнишните жита кај нас од суштинско значење се врнежите во периодот од март до јуни. Овој дожд позитивно ќе се одрази врз есенската пченица, бидејќи во фазата на вретенење, кога се оформуваат репродуктивните органи, на растението му е неопходна вода. Исто така, потребата за вода кај младите овошни насади е клучна за нивниот уедначен развој“, објаснуваат агрометеоролозите.

- Advertisement -

Според нив, за земјоделството најповолни се ситните, рамномерни дождови со мал интензитет. Поројните врнежи, пак, можат да предизвикаат ерозија, поплави и оштетување на посевите, бидејќи почвата не може да ја впие целата количина вода.

Земјоделските производители се советуваат да преземат мерки за заштита на посевите, расчистување на одводните канали и зацврстување на пластениците. Очекувањата се дека до утре ќе има локални поројни дождови, грмежи и засилен ветер, додека од недела ќе настапи продор на студена воздушна маса што ќе донесе врнежи од снег на планините и на повисоките места.