Зеленски откри што навистина сака од Трамп

Украинскиот претседател Володимир Зеленски јасно стави до знаење дека нема да прифати ниту еден цент од САД како компензација во врска со финансиската помош за Украина. Во изјава за новинарите, Зеленски нагласи дека не може да прифати ниту 10 центи како надомест за помошта која Америка ѝ ја обезбедува на Украина, пренесе Вашингтон пост.

Ова се случува во контекст на најавената средба со американскиот претседател Доналд Трамп, за која Зеленски изрази надеж дека ќе се одржи во петок.

Зеленски изјави дека ќе се сретне со Трамп за да разговараат за договорот за минерали, кој, како што се надева, ќе резултира со безбедносни гаранции за Украина. Претседателот нагласи дека неговиот тим работи со Белата куќа на деталите за патувањето, но тие сѐ уште не се потврдени.

- Advertisement -

– Навистина ми треба ова за доброто на нашиот народ – рече Зеленски.

Тој додаде дека ќе се сретне со Трамп, ако тоа биде потврдено, за да разјасни неколку клучни прашања, особено дали Америка ќе продолжи со воената помош за Украина. Зеленски истакна дека е важно да се знае „каде стоиме со САД“.

Претседателот исто така ќе го праша Трамп дали ќе биде дозволено Украина да купува оружје директно од САД, доколку Вашингтон ја прекине помошта, како и дали ќе може да користи пари од запленетите руски средства за оваа намена.

– Нешто што е многу важно е да не ја изгубиме Америка како главен гарант за нашата безбедност – додаде Зеленски, нагласувајќи дека ако Трамп се сретне со рускиот претседател Владимир Путин пред него, тоа ќе испрати опасен сигнал до светот.

Во одговор на напорите на Вашингтон да ја натера Украина да потпише договор за споделување на своето минерално богатство, Зеленски остро го отфрли планот кој наводно подразбираше компензација за целата финансиска помош што САД ја дале до сега.

Зеленски изрази јасна неподготвеност да го прифати таквиот план, нагласувајќи дека „не должиме ништо“ и дека не сака да создаде впечаток за лажен долг.

– Ние не должиме ништо. Нема да се согласам ниту на 10 центи компензација – категорично изјави Зеленски.

Претседателот на Украина продолжи да инсистира на важноста на членството во НАТО или на обезбедување еквивалентни безбедносни гаранции. Тој додаде дека ако Вашингтон не понуди такви гаранции, Украина ќе мора да побара решение на друго место.