Украинскиот претседател Володимир Зеленски објави декларација за имотот, приходите, расходите и финансиските обврски на неговото семејство за 2024 година, пишува Киев Индипендент.
Обврската за објавување на имотот на претседателот на Украина и останатите функционери беше суспендирана на почетокот на војната, но Зеленски во октомври 2023 година потпиша закон со кој се обнови обврската за задолжително објавување на имотната состојба на функционерите.
Според објавеното, приходот на семејството Зеленски во 2024 година бил 15.286.193 гривни (368.556 долари), вклучувајќи 8.585.532 гривни (207.000 долари) од продажба на државни обврзници. Останатите приходи се состојат од платата на претседателот, банкарските камати и приходите од изнајмување на сопствен недвижен имот.
„Зголемувањето на приходите на семејството на претседателот на Украина во однос на претходната година се должи на повторно целосно плаќање на киријата. Немаше други значајни промени во имотот, недвижниот имот или возилата на семејството на претседателот минатата година“, соопшти прес-службата.
Зеленски и членовите на неговото семејство пријавиле приход од 316.700 американски долари во 2023 година.
