Американскиот претседател Доналд Трамп изјави дека добил писмо од Володимир Зеленски во кое украинскиот лидер се согласува да „седне на преговарачка маса“ за да се постигне мировен договор во Украина.
„Го ценам што ми го испрати ова писмо“, рече Трамп, обраќајќи се на заедничката седница на Конгресот во Вашингтон.
Неговата изјава дојде откако Зеленски објави на социјалните мрежи дека е подготвен да работи под „силното водство“ на Трамп за да постигне траен мир.
Овие изјави укажуваат на смирување на тензиите меѓу двајцата лидери по нивната бурна средба во Овалната соба минатата недела, јавува Би-Би-Си.Во својот говор пред Конгресот, Трамп рече дека добил „важно писмо“ од Зеленски во вторникот, пред да прочита делови за кои тврдеше дека се од него.
Деловите што ги прочита соодветствуваа речиси дословно со претходната изјава што Зеленски ја објави во вторникот.
„Во писмото се вели дека Украина е подготвена да седне на преговарачка маса што е можно поскоро за да се доближи траен мир. „Никој не сака мир повеќе од Украинците“, рече Трамп.
Продолжувајќи да го чита, како што тврди, писмото од Зеленски, Трамп додаде: „Мојот тим и јас сме подготвени да работиме под силно водство на претседателот Трамп за да постигнеме траен мир“.
Трамп, исто така, рече дека Зеленски му рекол дека е подготвен да потпише договор за минерали за ретки земји со САД.
Украина се уште официјално не го коментираше писмото.
Русите подготвени за мир?
Американскиот претседател изјави и дека се воделе „сериозни разговори“ со Русија и дека добил „силни сигнали“ дека се подготвени за мир.
Трамп не прецизираше кога се одржале овие разговори и дали тој лично учествувал во нив.
„Време е да се стави крај на оваа бесмислена војна. „Ако сакате да ставите крај на војните, мора да разговарате со двете страни“, додаде тој.
