Зеленски: Апсолутно е невозможно да се сретнам со Путин во Москва, нека дојде во Киев

Топ Вести - Слушај сега

Украинскиот претседател Володимир Зеленски денес изјави дека е апсолутно неприфатливо за него да се сретне со рускиот претседател Владимир Путин во Москва, но јавно да го покани Путин, ако се осмели, да дојде во Киев на разговори.

- Advertisement -

„Апсолутно е невозможно за мене да се сретнам со Путин во Москва. Тоа би било исто како да се сретнам со него во Киев. Можам и да го поканам во Киев – нека дојде. Еве, јавно го поканувам, ако се осмели, да дојде во Киев“, рече Володимир Зеленски и нагласи дека Украина сака конструктивен договор за завршување на војната.

Зеленски рече дека сака продуктивен состанок, каде што ќе можат да разговараат и да решаваат отворени прашања, објавува Украинска правда.

„Но, ако некој не сака да се сретне, од некоја причина, не може директно да го каже тоа, тогаш се појавуваат такви покани од Москва. Јасно е што се случува“, рече тој.

Зеленски рече дека секогаш е подготвен за каков било формат на разговори што би ја завршиле војната, но невозможно е тоа да биде во Москва или Белорусија.

„Апсолутно е јасно зошто – едната од државите е агресорот што ја започна војната против нас, нè убива, а другата држава е партнер во овие акции“, нагласи Зеленски.

Претходно, украинскиот министер за надворешни работи Андриј Сибиха изјави дека Зеленски е подготвен да се сретне со Путин лице в лице за да се решат две клучни прашања од рамката за мир – териториите и управувањето со нуклеарната централа Запорожје, на што рускиот претседателски помошник Јуриј Ушаков одговори, велејќи дека Зеленски би можел да отпатува во Москва.

Зборувајќи за забрзаното членство на Украина во Европската Унија, Зеленски рече дека ова е реално сценарио и оцени дека ЕУ е безбедносна гаранција за иднината на земјата.

Ова е егзистенцијален избор, но не само од геополитички и економски причини, туку и од вредносни причини, рече украинскиот лидер.

„Она што нè интересира е забрзан пат. Во споредба со другите земји, нашите соседи и пријатели од Балканот, оние кои се кандидати и кои со право треба да бидат дел од ЕУ, тие не се во војна и немаат непријателска армија на своите граници, или на европските граници, што би го блокирало нивното членство во иднина“, рече Зеленски.

Според него, Русија би го блокирала членството на Украина во ЕУ во мирно време, бидејќи веќе го сториле тоа.

„Во нивен интерес е Украина да не е ниту во ЕУ ниту во НАТО. Тоа би била хибридна војна против пристапувањето на Украина во ЕУ“, рече Зеленски.