Минималната плата може да се донесе и во март, бидејќи променетата почнува да се исплаќа во април, изјави премиерот Христијан Мицкоски во врска со прашањето дали ќе има промена на износот на минималната плата или ќе се применува законски пресметаниот износ на оваа плата.
– Најпрво треба да формираме комисија која ќе ја утврди репрезентативноста на синдикатите бидејќи истече рокот на сегашната репрезентативност. Очекуваме на седница на влада да се формира таа комисија. Па потоа ќе се состане економско-социјалниот совет за да одлучува за минималната плата каде што покрај синдикатите се и работодавачите – рече Мицкоски.
Тој го повтори ставот дека владата ќе прифати повисока минимална плата, ако се договорат работодавачите и синдикатите.
Во врска со најавената официјална потрошувачка кошничка премиерот рече дека по одредување на репрезентативноста на синдикатите ќе се договори и методологијата на нејзино пресметување.
