Вучиќ донесе 13 одлуки за помилување

Српскиот претседател Александар Вучиќ донесе 13 одлуки за помилување, а на списокот на помилувани има студенти, професори и директори на неколку училишта, објави Претседателството на 29 јануари.

Одлуката доаѓа два дена откако Вучиќ најави дека ќе помилува студенти и професори против кои се води кривична постапка за учество во масовните протести кои се организираат низ Србија во последните три месеци.

Помилување на активистите уапсени за време на протестите е едно од барањата на студентите, заедно со барањето да се објават сите документи поврзани со изградбата на бетонската натстрешница на Железничката станица во Нови Сад.

- Advertisement -

Уривањето на натстрешницата на 1 ноември минатата година одзеде 15 животи.

Српскиот лидер во обраќање до нацијата во вторникот изјави дека во следните дена ќе биде одлучено дали ќе се формира нов владин состав со реконструкција на барем половина од министрите или ќе се оди на парламентарни избори кои можат да се одржат во април.

Денеска исто така е продолжен притворот за нови 30 дена за 10-те уапсени луѓе по трагедијата во Нови Сад и куќниот притвор за две осомничени лица.

Поранешниот српски министер за градежништво, Горан Весиќ ќе се брани од слобода, откако беше уважена жалбата на неговите адвокати. Обвинителството претходно соопшти дека за делата за кои се товарат е пропишана казна од две до 12 години затвор.

Инженерската комора на Србија претпладнево беше нова локација за демонстрантите, каде предадоа барања со потписи.

Студентите во четврток планираат нова акција. Белградските студенти ќе тргнат пешки за Нови Сад, за да им се придружат на тамошните колеги во блокадата на три моста в сабота.