Војната на Блискиот Исток го загрозува снабдувањето со лекови во земјите од Персискиот Залив, особено оние на кои им е потребна контролирана температура за време на транспортот, како што се лекови против рак и други

Топ Вести - Слушај сега

Војната на Блискиот Исток го загрозува снабдувањето со лекови во земјите од Персискиот Залив, особено оние на кои им е потребна контролирана температура за време на транспортот, како што се лекови против рак и други, изјавија неколку раководители од фармацевтската индустрија на вебинар организиран од логистичката група Pharma Aero.

- Advertisement -

Досега нема јасни знаци за големи недостиг, но раководителите на индустријата предупредуваат дека ситуацијата би можела брзо да се влоши ако војната продолжи. Земјите од Заливот се многу зависни од увозот, а многу лекови имаат краток рок на траење и мора да се чуваат во строго контролиран ладен синџир, што го прави долгорочниот копнен транспорт честопати непрактичен.

Прашант Јадав, експерт за глобално здравје вели дека залихите на краткотрајни, чувствителни на температура лекови и поскапи терапии обично траат околу 3 месеци. Меѓу најзагрозените се лековите за рак, особено моноклоналните антитела.

Прекините се веќе проблем за некои компании, вели тој, а некои купувачи предупредуваат дека залихите би можеле да паднат на критично ниски нивоа во следните 4 до 6 месеци, ако ситуацијата не се подобри.

Конфликтот на Блискиот Исток ги оневозможи клучните воздушни транзитни центри и ги затвори превозните правци, поради што протокот на многу производи, вклучително и лекови, е отежнат.

Претставниците на западните фармацевтски компании наведуваат дека бараат алтернативни патишта за испорака на лекови во Заливот, и дека дел од пратките се транспортираат со камиони од аеродроми како што се Џеда и Ријад во Саудиска Арабија. Истанбул и Оман се користат и како алтернативни точки.

Минатата недела, повеќе од сто претставници на фармацевтската и логистичката индустрија учествуваа на вебинар организиран од логистичката група Pharma Aero за да разговараат за кризата во Заливот и нејзиното влијание врз транспортот и синџирите на снабдување.