Русија и нејзиниот верен сојузник Белорусија денес започнаа заеднички воени вежби од големи размери, што предизвика загриженост кај земјите од НАТО, неколку дена откако руски беспилотни летала влегоа на полска територија.
Вежбите доаѓаат во време кога руската војска напредува на украинскиот фронт и ги засилува своите воздушни напади врз Украина, три и пол години по почетокот на големата офанзива во таа земја.
„Заедничките стратешки вежби на руските и белоруските воени сили започнаа“, соопшти руското Министерство за одбрана.
Вежбите, наречени „Запад 2025“, се одржуваат од петок до вторник во близина на град источно од Минск, соопштија белоруските власти.
Според руската војска, некои практични вежби ќе се одржат и на руска територија, како и во Баренцовото и Балтичкото Море.
Полска, Литванија и Латвија, членки на НАТО и соседи на Белорусија, се длабоко загрижени поради вежбите што се одржуваат толку блиску до нивните граници.
Сите три земји ја зајакнаа безбедноста и го ограничија воздушниот сообраќај во некои области, а Варшава нареди целосно затворање на својата граница со Белорусија за време на траењето на вежбите.
Русија ги отфрли загриженостите во врска со вежбите. Портпаролот на Кремљ, Дмитриј Песков, увери дека станува збор за „планирани вежби кои не се насочени против никого“.
Воените вежби „Запад“ обично се одржуваат на секои четири години. Изданието од 2025 година е прво откако започна конфликтот во Украина во февруари 2022 година. Вежбите од 2021 година мобилизираа околу 200.000 руски војници, неколку месеци пред да започне инвазијата на Украина.
Овој пат, се очекува обемот на вежбите да биде многу помал, бидејќи илјадници руски војници се распоредени во Украина.
Белорусија објави во јануари дека 13.000 војници ќе учествуваат во вежбите, но во мај рече дека тој број ќе биде преполовен.
