Тропските горештини кои ја зафатија Македонија деновиве значително ја зголемија потрошувачката на струја, а за тоа најмногу придонесува ладењето кое е вклучено дури и во текот на ноќта.
Од ЕВН велат дека првата недела од јули потрошувачката на струјата е повисока за околу 10% во однос на истиот период лани и последната недела од јуни годинава. Сепак, додаваат, не се очекуваат проблеми во системот, бидејќи е димензиониран за да може нормално да функционира и при зголемени оптоварувања.
Според податоците на компанијата, во периодот од 1 до 6 јули во земјава се потрошени 89.395 MWh што е повеќе од истиот период лани, кога се потрошени 79.990 MWh. Ова е резултат на тоа што во првата недела од јули годинава е потопло од лани, па граѓаните повеќе користат струја за разладување.
Најголема потрошувачка е регистрирана на 1 јули кога се потрошени 15.117 MWh. Просечната дневна потрошувачка за тој период лани е 13.331 MWh.
– Разликата се јавува поради разликата на температурите, а оваа година во првата недела од јули имаме значително повисоки температури од истиот период лани – велат од ЕВН.
Скопје и регионот учествуваат со повеќе од 40% од вкупната потрошувачка на електрична енергија во првата недела од јули. По него следи Тетово.
– Како најголемо конзумно подрачје, скопскиот регион, во овој период има вкупна потрошувачка од 35.713 MWh или во просек 5.952 MWh дневно. Најголемата потрошувачка е на 1.7.2025, ден вторник и изнесуваше 6.215 MWh – велат од ЕВН.
Податоците за минатиот месец покажуваат дека лани во јуни се потрошени повеќе киловати струја од годинава.
– Во јуни 2024 година потрошувачката изнесуваше 405.849 MWh. Просечната дневна потрошувачка за тој период е 13.528 MWh. Минатогодишниот јуни имаше повеќе денови со измерени температури од над 40 степени и затоа има за нијанса поголема вкупна потрошувачка – велат од ЕВН.
Во јуни годинава се потрошени вкупно 393.623 MWh, а најголема потрошувачка од 15.424 MWh е регистрирана на 26 јуни, што беше и најтопол ден месецот.
И во јуни скопскиот регион потроши најмногу струја. Вкупна потрошувачка во овој регион во јуни изнесува 155.887 MWh или во просек 5.196 MWh дневно. Најголемата потрошувачка e на 26.6.2025 (ден четврток) и изнесувала 6.312 MWh.
Со оглед на најавите дека цело лето ќе има високи температури поради од ЕВН велат дека не очекуваат некои големи осцилации на потрошувачката на електрична енергија и посебно проблеми со системот. Според нив, летната потрошувачка на струја е далеку пониска од онаа која се регистрира во зимскиот период, кога голем број на домаќинства струјата ја користи за загревање.
– Не очекуваме проблеми. Системот е димензиониран за да може нормално да функционира и во услови на зголемени оптоварувања. Како за споредба, во јануари 2025 година, просечната дневна потрошувачка е 24.082 MWh, а најголемата е регистрирана на ден 21.1.2025 и изнесувала 26.421 MWh – велат од ЕВН.
Според податоците на ЕСМ, пак, дневно се произведуваат повеќе од 8.000 MWh струја. Најголем дел се произведува од термоелектраните, 59% и од хидроелектраните 39%, а остатокот е од ветерниците.
Ова лето, четири земји во регионот останаа без електрична енергија, а во април тоа им се случи на Шпанија и на Португалија.
Институциите задолжени за секторот велат дека ја следат состојбата.
