Скопје – Во изненадувачки потег, Меѓународната федерација за фан-клубови денеска официјално ја прогласи ВМРО-ДПМНЕ за најпосветен фан-клуб на политичарот Венко Филипче, надминувајќи ги дури и неговите најблиски роднини и пријатели.
“Честитки на ВМРО-ДПМНЕ за оваа престижна награда”, изјави портпаролот на федерацијата. “Во нашата 50-годишна историја, ретко сме виделе таква посветеност. Тие буквално не можат да престанат да зборуваат за него.”
Викторија Андоновска, главната заслужна за наградата, денеска одржа својата 247-та по ред прес-конференција посветена исклучиво на Филипче. “Денес ќе зборуваме за Филипче”, започна таа, пред да продолжи со уште 45 минути детална анализа на неговото влијание врз квантната физика, климатските промени и цените на лебот .
Политички аналитичари се збунети. “Победија на изборите со удобна разлика, но делува како да сè уште водат кампања против Филипче”, коментира еден од нив. “Почнавме да се прашуваме дали Филипче навистина не е некаква тајна супер-моќ за која ние смртниците не знаеме.”
Самиот Филипче, кога беше прашан за коментар, само ги крена рацете во знак на предавање: “Не знам што повеќе да кажам. Жив сум, дишам, понекогаш одам на кафе. Не сум свесен дека претставувам ноќна мора, иако признавам дека понекогаш гласно кивам како резултат на оговарања”.
Меѓувремено, портпаролите на ВМРО-ДПМНЕ најавија дека во следните шест месеци планираат уште 180 прес-конференции, сите посветени на темата “Филипче: анализа, ре-анализа и ре-ре-анализа.”
Кога еден новинар сe дрзна да ги праша за новите случувања во ресорот на Цветан Трипуноски, микрофонот мистериозно престана да работи, а светлата во салата изненадувачки се згаснаа.
“Филипче” – единствените зборчиња што се слушна од темнината.
Редакција: Овој текст е сатира. Секоја сличност со вистинските настани е случајна, иронична, и веројатно малку тажна.
Сашо ДЕНЕСОВСКИ
