Властите во Белорусија вчера ослободија од затвор вкупно 123 затвореници, меѓу кои и добитникот на Нобеловата награда за мир, Алес Бељацки, како и истакнатите опозиционери Марија Колесникова и Виктор Бабарико.
Овој чин на помилување, потврден од државната новинска агенција БелТА и правобранителите, доаѓа во момент кога белорускиот претседател Александар Лукашенко се обидува да ги подобри односите со Вашингтон и да издејствува олеснување на западните санкции.
Како директен резултат на преговорите, претходно денеска САД објавија дека ги укинуваат санкциите за белорускиот калиум карбонат. Одлуката беше објавена од Џон Коул, специјалниот пратеник на американскиот претседател Доналд Трамп за Белорусија, по дводневните средби со Лукашенко во Минск.
Во разговор со новинарите, Коул ги опиша преговорите како „многу продуктивни“ и нагласи дека нормализирањето на односите меѓу Вашингтон и Минск е американска цел.
– Ги отстрануваме санкциите, ослободуваме затвореници. Постојано комуницираме меѓу себе – изјави Коул, додавајќи дека односите меѓу двете земји минуваат од „мали чекори кон посигурни чекори“.
Иако Лукашенко помилувал 123 затвореници, нивните понатамошни дестинации биле различни.
Според украинскиот Координативен центар за воени заробеници, повеќе од 110 лица од ослободените се префрлени во Украина.
„Белорусија префрли 114 цивили во Украина, меѓу кои и Украинци“, напиша Центарот на „Телеграм“, појаснувајќи дека оние кои сакаат може да заминат во Полска или во Литванија.
Франак Вјачорка, советник на опозициската лидерка во егзил, Светлана Тихановска, изјави дека првичниот план предвидувал сите да бидат испратени во Литванија, но Лукашенко „ненадејно одлучил“ да ги префрли во Украина.
Сепак, Нобеловецот Алес Бељацки и уште осуммина од ослободените, вклучувајќи ги и истакнатите опозиционери, веќе се наоѓаат во Литванија, потврди американската амбасада во Вилнус. Меѓу другите попознати имиња на ослободени затвореници се Максим Знак, Марина Золотова, Владимир Лабкович и Валентин Степанович.
Белорусија, како близок сојузник на Русија, со години се соочува со западни санкции поради репресијата врз човековите права и поради тоа што ѝ дозволи на Москва да ја користи нејзината територија за инвазијата на Украина во 2022 година.
Претседателката на Европската комисија Урсула фон дер Лајен денеска го поздрави ослободувањето на лауреатот на Нобеловата награда за мир, Алес Бељацки, опозиционерката Марија Колесникова и на уште 121 политички затвореник.
„Овој развој на настаните ја зајакнува нашата решителност. Решителноста да ја продолжиме борбата за сите затвореници кои сѐ уште се во затвор во Белорусија, затоа што имаа храброст да ѝ ја кажат вистината на власта“, напиша таа на социјалната мрежа Икс.
