Владимир Штимац, поранешен српски кошаркар и репрезентативец, е уапсен во Белград по налог на Вишото јавно обвинителство

Владимир Штимац, поранешен српски кошаркар и репрезентативец, е уапсен во Белград по налог на Вишото јавно обвинителство, јави Радио-телевизија Србија. Според соопштението на Министерството за внатрешни работи, полицијата привела вкупно 37 лица поради нарушување на јавниот ред и мир за време на синоќешниот протест пред Народното собрание.

Меѓу уапсените е и Штимац, кој е обвинет дека за време на непријавениот протест „поттикнувал на насилство со цел насилно соборување на легитимно избраните претставници на власта“.

Во соопштението се наведува и дека тој „најгрубо ги навредувал полициските службеници за време на протестот“.

- Advertisement -

Министерството за внатрешни работи соопшти дека „полицијата идентификувала и привела 37 лица кои учествувале во нарушување на јавниот ред и мир и предизвикување инциденти за време на непријавеното јавно собирање“.

„Полицијата ќе продолжи доследно да ги применува сите законски мерки за зачувување на редот, мирот и безбедноста на граѓаните“, стои во соопштението на српското МВР.

Штимац се појави како поддржувач на студентските и граѓанските протести против власта на Александар Вучиќ.

Тој е познат по настапите во кошаркарските клубови Црвена ѕвезда и Баерн Минхен и е поранешен репрезентативец на Србија и европски шампион со младинската селекција. Последните години е активен во јавниот живот, каде отворено ги коментира општествено-политичките случувања.

Студентите кои протестираа синоќа имаа посебна порака до Дијана Хрка, мајката на Стефан, кој лани на 1 ноември загина при падот на настрешницата на железничката станица во Нови Сад, а која денеска почна штрајк со глад пред српскиот Парлемент, потенцирајќи дека „таа не смее да остане сама“.