Владата размислува да ја реорганизира Градската општа болница „8 Септември“ во Скопје во регионален центар и да ја паузира идејата за нов клинички центар, откри директорот на Фондот за здравствено осигурување(ФЗО), Сашо Клековски, презентирајќи го овогодишниот буџет на фондот „План 2025“.
Клековски објасни дека ваквото размислување доаѓа поради демографскиот пад на населението, од една страна, но и неискористените капацитети на „8 Септември“ кои можат значително да го растеретат постојниот Клинички центар „Мајка Тереза“.
– Нам демографијата ни паѓа, со текот на годините имаме сѐ помалку население, така што мораме да ги погледнеме и бројките на осигуреници и на пациенти. Второ, дел од капацитетите не се искористени како што треба. Од сите постоечки капацитети во Македонија, најблиску до стандарди за нешто повеќе, вклучувајќи и за универзитетска клиника, има „8 Септември“.
Клековски објасни дека „8 Септември“ поседува 150 квадратни метри со болнички кревети наспроти Стара Градска каде што има нешто повеќе од 30 квадратни метри. Тој спомна и дека во извештаи на Светската здравствена организација (СЗО) се споменува дека е потребна реорганизација на здравството.
– Морам да кажам дека во „8 Септември“ се изведуваат методи кои не се изведуваат на Клиника. Тука гледаме најмногу потенцијал, со најмало вложување да добиеме најдобар одговор. Освен Онкологијата, мислам дека ќе бидат најавени нови проекти, како на пример Нефрологија – рече Клековски додавајќи дека за оваа идеја се потребни законски измени.
