Владата планира мандатот да го заврши со БДП од 20 милијарди долари
Домашниот бруто производ по жител идната година номинално ќе надмине 10.000 долари, одговори премиерот Христијан Мицкоски на прашање поставено денеска на увидот на градежните работи на проектот градски воз.
Тој рече дека очекува растот на реалниот домашен бруто-производ да биде над 3,5% годинава, а на номиналниот повеќе од 7,5%.
– Ќе се приближиме до целта на оваа Влада, а тоа е до крајот на мандатот да имаме домашен бруто производ од 20 милијарди долари. Таа бројка ќе ја стигнеме веќе следната година и оваа година за прв пат номиналниот домашен бруто – производ по глава на жител ќе имаме петоцифрена бројка во долари. Односно, над 10.000 долари ќе биде домашниот бруто-производ по глава на жител – рече Мицкоски.
Тој додаде дека со тоа стратешките цели планирани до крајот на мандатот на владата ќе бидат реализирани уште следната година.
– Што е добро и охрабрувачки. Тоа е практично и дел од извештајот на Европската комисија за напредокот на земјата, но исто така и сите меѓународни финансиски институции ги нивелираат и ги зголемуваат прогнозите и проекциите за раст на економијата во државата – рече Мицкоски.
Мицкоски и денеска повтори дека во октомври инфлацијата ќе биде нешто над трендот изминатите месеци, односно дека ќе се движи меѓу 4 и 4,5% поради ниската база во минатата година предизвикана од владините мерки за цени.
-Но, потоа очекувам пристојно намалување во ноември и во декември, така што просечната годишна стапка на инфлација оваа година ќе заврши меѓу 3,5 и 4%, што е една од најниските во Европа и во регионот – рече Мицкоски.
Тој очекува следната година нивото на инфлација да се движи меѓу 2 и 3%.
Номиналниот домашен бруто производ (БДП) лани, според Државниот завод за статистика изнесуваше 17,2 милијарди долари.
(Номиналниот БДП се пресметува по тековни цени, при што количината на финалните добра и услуги се множи со цените коишто се актуелни во годината за којашто се прави калкулацијата. Реалниот БДП се изразува по постојани цени, така што добрата и услугите се множат по цени утврдени во базната година).
