Владата издвои 30 милиони денари, „Пониква“ станува центар за рехабилитација

По трагедијата со трагични размери во Кочани, во која животот го загубија 62 млади лица, Владата соопшти дека презема итни и конкретни мерки за помош на повредените и нивните семејства, како и за расветлување на случајот.

Од владината прес-служба велат дека болката на семејствата не може да се измери, но институциите се должни да сторат сè за да ја олеснат маката на преживеаните и блиските на настраданите.

„До сега како Влада обезбедивме 30 милиони денари за транспортот и сместувањето на придружбата – односно на членовите на семејствата на повредените пациенти. Но нашата грижа не завршува тука. Кочани е наш приоритет и никој не смее да биде заборавен“, пишува во соопштението.

- Advertisement -

Дополнително, активирана е специјална телефонска линија која е во директна комуникација со претседателот на Владата. На бројот 070/355-526, повредените и нивните семејства можат да ги изнесат своите барања, потреби и предлози.

На следната владина седница ќе се донесе и одлука за пренамена на одморалиштето „Пониква“ во рехабилитациски центар, каде ќе се овозможи здравствена и психолошка поддршка за повредените.

„Објектот има капацитет од 27 соби и 56 легла. Медицински тимови таму ќе работат на рехабилитација и психофизичка стабилизација“, наведуваат од Владата.

Од Владата порачаа дека ова е заедничка борба, и дека никој од повредените или семејствата на загинатите нема да остане сам.

„Ќе сториме сè што е во наша надлежност да помогнеме и да ја ублажиме болката. Ова се конкретни мерки од интерес за граѓаните. Државата мора – и се менува“, додаваат од Владата.