Високи руски претставници ќе разговараат со нивните американски колеги за обновување на врските, Украина и подготовка за средба меѓу рускиот претседател Владимир Путин и американскиот претседател Доналд Трамп, соопшти денеска Кремљ.
Портпаролот на Кремљ Дмитриј Песков изјави дека рускиот министер за надворешни работи Сергеј Лавров и советникот на Путин за надворешни работи Јуриј Ушаков подоцна денеска ќе отпатуваат во Ријад, главниот град на Саудиска Арабија, за да учествуваат на разговорите, кои ќе се одржат во вторник.
Тој рече дека разговорите првенствено ќе се фокусираат на „обновување на целиот комплекс на американско-руски односи“, како и организирање на можни разговори за Украина и средба меѓу двајцата претседатели.
Претставникот на американскиот претседател Трамп, Стив Виткоф, вчера изјави за Фокс њуз дека тој и американскиот советник за национална безбедност ќе отпатуваат во Саудиска Арабија на разговори за Украина.
Американскиот државен секретар Марко Рубио денеска од Израел пристигна во Ријад, каде што треба да се сретне со руски претставници и да разговара за завршување на војната во Украина.
Извор близок до саудиската влада денеска за АФП изјави дека земјата ќе биде домаќин на подготвителна средба меѓу високи руски и американски претставници во вторник за самитот меѓу рускиот и американскиот претседател за Украина.
Изворот рече дека американскиот претседателски советник Мајк Волц и специјалниот пратеник за Блискиот Исток Стив Виткоу ќе ги претставуваат САД. Американскиот државен секретар Марко Рубио ја предводи делегацијата во Саудиска Арабија на разговори со руски претставници во наредните денови, со цел да се прекинат борбите во Украина.
