Светот го памети Виктор Јушченко по бурната 2004 година, а лузните од труењето што го претрпе за време на тогашните претседателски избори и денес се видливи на неговото лице. Откако стотици илјади луѓе во Портокаловата револуција протестираа против изборната измама која ја донесе победата на прорускиот Виктор Јанукович, изборите беа повторени. Јушченко стана првиот украински претседател кој недвосмислено се залагаше за прекин на врските со Русија.
Денес 71-годишниот Јушченко води повлечен јавен живот, избегнувајќи го вниманието на медиумите, бидејќи, како што признава, политичката борба го исцрпела. Во разговор со новинари во неговата канцеларија во Киев, поранешниот претседател изрази песимизам во однос на дипломатската стратегија на Доналд Трамп за преговори со Владимир Путин околу завршувањето на војната. Средбата со Путин ја нарече „слепа улица“.
– Тој е криминалец, треба да изгние зад решетки – остро се изрази Јушченко зборувајќи за Путин. – Дијалогот со него е губење време, мирот за него претставува пораз — тоа би бил негов политички, а можеби и физички крај – додаде Јушченко, објаснувајќи дека рускиот претседател само купува време со празни иницијативи, бидејќи најмногу се плаши од мир.
Јушченко повлече паралела со ситуацијата пред Втората светска војна, предупредувајќи дека оној што ќе потпише договор со рускиот автократ би можел да ја повтори грешката на британскиот премиер Невил Чемберлен од 1938 година. „Ми се чини дека сме ужасно блиску до истото трагично сценарио“, рече, потсетувајќи на премолченото одобрување на Европа при руската инвазија на Грузија во 2008 година и анексијата на Крим во 2014.
Како решение, Јушченко гледа исклучиво во зајакнување на украинската војска со меѓународна помош и притисок врз Кина. „Само еден збор од Си Џинпинг може да предизвика големи промени во оваа војна“, тврди поранешниот претседател, нагласувајќи дека Европа има доволно моќ за да влијае врз Пекинг. Тој, исто така, се залага за безусловна примена на секундарни санкции против земјите кои му помагаат на Кремљ да ги заобиколи ограничувањата.
Иако истражувањата покажуваат дека мнозинството Украинци сакаат што поскор завршеток на војната, тие исто така се уверени дека стабилен мир со Русија како сосед е малку веројатен.
Јушченко смета дека за мир во Европа е неопходно исчезнување на „режимот на Путин“ и демократизација на Русија, но не верува дека руското општество е подготвено за тоа. „Проблемот на Русија не е само Путин. По царскиот и советскиот режим се развил менталитет на кметови, визија во која слободата не се цени и за која не се бори“, изјави тој.
