Ултрадесничарскиот израелски министер за финансии, Бецалел Смотрич, ја поздрави идејата на американскиот претседател Доналд Трамп за преселување на палестинските жители од Појасот Газа во соседните арапски држави.
– По 76 години, во кои мнозинството од населението на Газа беше држено во тешки услови, идејата да им се помогне со наоѓање други места каде што би можеле да започнат нов живот е извонредна – објави Смотрич на својот профил на Икс.
Тој истакна дека традиционалните политички предлози, како создавањето палестинска држава, само ја загрозуваат безбедноста на Израел, повикувајќи на нестандардни пристапи за воспоставување мир.
– Само нови идеи може да донесат вистинска безбедност – додаде Смотрич.
Трамп, во своето обраќање, најави дека разговарал со јорданскиот крал Абдулах за преселување на бегалците од Газа и дека ќе иницира разговори со претседателот на Египет, Абдел Фатах ал Сиси. Тој рече дека мерката може да биде долгорочна или привремена, додека не се обнови уништената енклава.
– Целиот Појас Газа е хаос. Луѓето таму умираат. Сакам да најдеме алтернативно место каде што ќе живеат во мир – изјави Трамп.
Идејата беше поддржана и од лидерот на ултрадесничарската партија „Еврејска сила,“ Итамар Бен-Гвир, кој минатата недела поднесе оставка како министер за национална безбедност.
Палестинскиот движење Хамас остро го осуди предлогот на Трамп.
– Нашиот народ во Газа преживеа 15 месеци во смрт и уништување без да ја напушти својата земја. Нема да прифатиме никакви предлози за раселување, дури и ако тие се претставуваат како добронамерни – изјави Башем Наим од политичкото биро на Хамас.
Според ОН, повеќе од два милиона жители на Газа се раселени за време на војната, а 60% од инфраструктурата е уништена или оштетена. Обновата, според процените, може да трае со децении.
Во меѓувреме, повеќе од два милиони палестински бегалци живеат во Јордан, а илјадници побегнаа во Египет за време на последните судири, каде што немаат статус на бегалци.
