Русија вели дека соборила 221 украински дрон лансиран на нејзина територија преку ноќ, во еден од најголемите воздушни напади од мај, пренесува Би-Би-Си.
Повеќе од половина од дроновите биле пресретнати над регионите Брјанск и Смоленск, југозападно од Москва, каде што наводно биле цел на објектите на нафтената компанија Лукоил, соопшти руското Министерство за одбрана.
Властите во регионот Ленинград соопштија дека биле соборени 28 дронови и дека избувнал пожар на брод во балтичкото пристаниште Приморск, најголемиот нафтен терминал во Русија. Тие додадоа дека пожарот бил изгаснат без жртви или протекување.
Во меѓувреме, официјалните лица изјавија дека двајца цивили биле убиени во украинскиот регион Сумски кога лизгачка бомба погодила село во близина на границата. Пресретнувања се пријавени во најмалку 9 други региони на Русија, вклучувајќи ги Калуга, Новгород и московската област, каде што се вели дека се уништени девет дронови.
– Седум лица, меѓу кои пет цивили и двe воени лица, беа повредени кога беспилотно летало удри автобус во Брјанск – изјави гувернерот на регионот Александар Богомаз.
Податоците на Москва, кои Би-Би-Си не можел независно да ги потврди, сугерираат дека нападот од четвртокот навечер претставува едно од најголемите украински воздушни бомбардирања во последните четири месеци.
На 7 мај годинава Москва соопшти дека соборила 524 украински дронови.
За споредба, украинските власти изјавија дека Русија впрегнала 818 беспилотни летала во напади на украинска територија во последните недели.
