Младите кои ќе се запишат во гимназиско образование оваа година, за 10 години отсега ќе треба да знаат вештачка интелигенција, програмирање, математика, физика, но и претприемништво, за да се вклучат на пазарот на трудот, а овој систем кој не е променет од 1995 година и не им го овозможува тоа. Затоа се потребни промени и наместо критики, добро е да слушнеме конструктивни сугестии и предлози, истакна министерката за образование и наука Весна Јаневска на денешната собраниска седница.
Одговарајќи на пратеничко прашање во врска со процесот на усвојување на нова концепција за гимназиското образование, Јаневска рече дека веќе е почнато електронското прибирање сугестии, а ако пратениците одлучат, ќе се организира и собраниска расправа.
Според неа, концепцијата ќе им понуди право на избор на учениците.
– Имаме нацрт верзија на концепцијата и почнавме електронско прибирање сугестии. Ќе дискутираме цела година, ќе го слушнеме мислењето на сите засегнати страни – нагласи Јаневска.
Министерката истакна дека сосема го разбира стравот на јавноста од промени, „затоа што претходната влада носела одлуки со декрет и за образовните концепти не постоела широка дебата“. Притоа ја посочи како пример Концепцијата за основно образование за која, рече, се организирала само една дебата во Собранието, по што и била усвоена, без можности за забелешки.
