Последната објава на претседателот на САД, Доналд Трамп, на социјалните мрежи го детализира неговиот план за Газа, иако голем дел од тоа останува нејасно и некои елементи веќе се побиени од неговите сопствени функционери, пишува Би-Би-Си.
На својата платформа Трут сошал, Трамп напиша дека Израел „ќе им ја предаде Газа на САД по завршувањето на борбите“.
„Израел ќе им го предаде Појасот Газа на Соединетите Американски Држави по завршувањето на борбите. Палестинците, луѓето како Чак Шумер, веќе ќе беа преселени во многу побезбедни и поубави заедници, со нови и модерни домови во регионот“, се вели во неговата објава на Трут сошал.
Трамп смета дека Палестинците ќе добијат шанса да бидат среќни, безбедни и слободни.
„Тие всушност би имале шанса да бидат среќни, безбедни и слободни. САД, кои работат со големи развојни тимови од целиот свет, полека и внимателно би ја почнале изградбата на она што ќе стане еден од најголемите и најспектакуларни случувања од ваков вид на Земјината топка. Нема да бидат потребни војници од САД! Би владеела стабилност за регионот!“, напиша Трамп.
Чак Шумер, од еврејско потекло, е лидер на малцинството во Сенатот и демократ. Во говорот минатата недела тој го критикуваше Трамп дека постапките му се „непромислени и незаконски“.
Планот на Трамп предвидува Израел првин да ги протера сите Палестинци, а САД потоа да ја преземат територијата.
Сепак, Трамп вели дека ова би било направено без употреба на американски војници.
Тој веќе рече дека САД нема да платат за сето тоа, а дека реконструкцијата ќе биде финансирана од други земји за „луѓето во светот“ да можат да живеат во Газа додека повеќето Палестинци би биле „преселени… трајно“ на друго место.
Трамп првпат го објави својот план за Газа во вторникот вечерта, велејќи дека сака САД да заземат „долгорочна сопственичка позиција“.
