Американскиот претседател Доналд Трамп на својата социјална мрежа „TruthSocial“ остро го критикуваше украинскиот претседател Володимир Зеленски. Трамп претходно изјави дека Зеленски има ниска поддршка од народот според последните анкети, на што Зеленски одговори дека нема да дозволи да биде сменет и дека Трамп живее во меур од руски дезинформации.
Трамп возврати пишувајќи дека Зеленски бил добар само во „вртење на Бајден околу малиот прст“.
„Замислете, најуспешниот комичар, Володимир Зеленски, успеа да ги убеди САД да потрошат 350 милијарди долари за да влезат во војна во која не можат да победат, што никогаш не требаше да се случи. Сепак, тоа е војна што без Америка и Трамп никогаш не можеше да се реши. САД потрошија околу 200 милијарди долари повеќе од Европа, нивните пари се загарантирани, додека САД нема да добијат ништо. Зошто заспаниот Џо Бајден не бараше реми, со оглед на тоа дека оваа војна е далеку поважна за Европа отколку за нас. Имаме голем, прекрасен океан кој нè разделува. На крајот од сето тоа, Зеленски призна дека половина од парите што ги испративме исчезнале. Тој одбива да одржи избори, има мала поддршка и единственото нешто во што е добар е „вртење на Бајден околу малиот прст“, напиша Трамп.
Тој го нарече Зеленски „диктатор без избори“ и порача „Зеленски подобро да побрза или ќе ја изгуби државата“.
„Во меѓувреме, ние успешно преговараме за крај на војната со Руската Федерација, само нашата администрација може да го реши ова. Бајден никогаш не се ни обидел. Европа не успеа да воспостави мир, а Зеленски веројатно сака ‘златната кокошка’ да продолжи да дава. Ја сакам Украина, но Зеленски заврши ужасна работа, неговата земја е уништена, милиони умреа без потреба и тоа продолжува“, додава Трамп во објавата.
Минатиот викенд се одржа Минхенската безбедносна конференција на која американскиот специјален пратеник на Трамп, Кит Келог, најави дека Европа нема да учествува во мировните преговори за ставање крај на војната во Украина, туку ќе има советодавна улога.
Првата фаза од руско-американските преговори започна во вторникот, 18 февруари, во Ријад, Саудиска Арабија.
Украинскиот претседател Володимир Зеленски изјави дека Украина не ги признава руско-американските преговори. Тој исто така требаше да биде во Ријад во среда, но го откажа своето патување.
