Трамп го губи трпението со Москва и со Киев

Официјални лица во Белата куќа признаа дека претседателот на САД, Доналд Трамп, нема да може да обезбеди прекин на огнот во Украина за претстојниот Велигден, објави британски Телеграф.

Извори наведуваат дека администрацијата на Трамп е значително фрустрирана од тактиката на официјален Кремљ и се подготвува да изврши дополнителен притисок врз Москва и врз Киев да постигнат договор за прекин на огнот.

Ништо од примирјето за Велигден

На почетокот на вториот мандат, Трамп си постави цел да обезбеди примирје во Украина до април или до мај, по што ќе започнат разговорите за постојан мир.

- Advertisement -

– Сепак, нема да има таков договор во наредните месеци – изјави висок функционер на администрацијата на Трамп кој сакал да остане анонимен.

Ова автоматски ја зголемува можноста конфликтот, кој трае повеќе од 3 години, да продолжи. Неуспехот да се стави крај на војната би бил значаен удар за Трамп кој за време на неговата претседателска кампања постојано ветуваше дека ќе го прекине конфликтот во рок од 24 часа по враќањето во Белата куќа.

Американските функционери со недели приватно се жалат на начинот на кој Киев ги води преговорите и на она што тие го гледаат како отпор кон договорот за минерали со Вашингтон и кон напредок во мировните преговори.

Трамп ги откри своите чувства во неделата кога ненадејно директно го нападна Владимир Путин, велејќи дека е „бесен“ на рускиот претседател поради застојот на преговорите за прекин на огнот.

Фрустрација со Москва, нафтени санкции на повидок?

Во серијата повици и состаноци за време на викендот, претставници на Белата куќа и Стејт департментот признаа дека Путин активно се спротивставува на обидите на Вашингтон да постигне траен договор и разговараа за тоа какви економски и дипломатски санкции би можеле да воведат.

– Постои длабока фрустрација од преговорите со руската влада – изјави портпаролот на Советот за национална безбедност на САД, Џејмс Хјуит.

Тој додаде дека „Трамп е јасен“ дека ќе воведе секундарни нафтени санкции доколку Русија „не е сериозна за завршување на овој конфликт со мирно решение“.

Трамп го промени тонот, веќе не му верува на Путин

Гневот кон Москва означува значителна промена во верувањето на Вашингтон дека Русија е подготвена за преговори. Трамп со недели тврдеше дека му верува на рускиот претседател и оти верува дека (Путин) е посветен на мирот, но Белата куќа стана повнимателна во врска со намерите на Путин во последните денови, велат изворите.

Таков пресврт би бил добредојден за Киев и за неговите европски сојузници кои предупредија дека Путин си игра игри и нема интерес за мир.

Двете страни постојано се обвинуваат меѓусебно за кршење на договорот постигнат со посредство на САД да не се напаѓаат цели на енергетската инфраструктура, а руското воздушно бомбардирање на Украина не попушта.

Како доказ дека Путин можеби се подготвува за проширување на конфликтот, тој во понеделникот нареди најголема мобилизација во последните 14 години, барајќи 160.000 мажи да бидат повикани во руската армија до средината на јули.