Техеран возвраќа на обвинувањата од Меѓународната агенција за атомска енергија

Иран денеска најави дека ќе гради нова, трета постројка за збогатување ураниум на безбедна локација. Најавата уследи по резолуцијата на Меѓународната агенција за атомска енергија (МААЕ), во која се обвинува Техеран дека не ги исполнува своите нуклеарни обврски.

„Исламска Република Иран нема друг избор освен да одговори на оваа политичка резолуција. Според тоа, шефот на Организацијата за атомска енергија на Иран ги издаде неопходните наредби за изградба на нов центар за збогатување на безбедна локација“, се наведува во заедничката изјава на иранското Министерство за надворешни работи и Организацијата за атомска енергија на Иран.

Во соопштението, наводите на МААЕ се оценети дека се „без правна основа“ и „политички мотивирани“.

- Advertisement -

Претходно, 35-члениот Извршен одбор на МААЕ усвои резолуција – иницирана од САД, Франција, Германија и од Велика Британија – во која се потенцира дека Иран „не ги исполнува своите обврски“ и предупреди дека прашањето може да биде предадено на Советот за безбедност на ОН.

МААЕ истакна дека Техеран со години одбивал да ги објави своите нуклеарни активности, додека инспекторите откриле траги од ураниум и други сомнителни докази на непријавени локации.

Иран претходно се закани дека ќе се повлече од Договорот за неширење нуклеарно оружје (НПТ).