Министерството за одбрана на Тајван соопшти дека денеска било наредено распоредување на сили околу островот, како одговор на кинеските воени маневри.
Пекинг мобилизираше 32 авиона околу Тајван и најави вежби со боева муниција во област на околу 74 километри од островот.
Тајван наредил воздушните, копнените и поморските сили да „набљудуваат, предупредуваат и да реагираат на соодветен начин“, се наведува во соопштението на Министерството.
Во соопштението се додава дека кинеските вежби го зголемиле ризикот за безбедноста на меѓународните летови и бродови, а претставуваат и очигледна провокација во однос на регионалната безбедност и стабилност.
Кина во последните години сè почесто распоредува авиони и воени бродови околу Тајван, за кој тврди дека е дел од кинеската територија. Пекинг не го исклучува користењето на сила за преземање на контрола врз островот.
