Стармер му даде необичен подарок на Трамп

Во обид да ги зајакне врските со Соединетите Американски Држави и нивниот претседател Доналд Трамп, британскиот премиер Кир Стармер му подари на американскиот лидер необичен и симболичен подарок – министерски „црвен куфер“, кој инаку е резервиран исклучиво за членовите на британската влада, објави Политико.

Подарокот беше врачeн за време на државен прием во Лондон, организиран по повод официјалната посета на Трамп.

За оваа пригода, британските власти приредија најголема почесна гарда досега за американски претседател, заедно со средба со монархот и прием во замокот Виндзор.

- Advertisement -

Според извори во Лондон, Стармер сакал со овој гест да ја истакне важноста на билатералните односи, особено по постигнувањето на договори за намалување на извозните тарифи. Владата нагласува дека подарокот симболизира признавање на значењето на американско-британското партнерство, но и лична доверба меѓу двајцата лидери.

Иако Трамп ја пофали својата соработка со Стармер, во Лондон постои загриженост дека домашните политички скандали би можеле да влијаат на перцепцијата за американскиот претседател. Оставката на британскиот амбасадор во Вашингтон поради аферата Џефри Епштајн, како и оставката на заменик-премиерот, доведоа до зголемени тензии во тимот на Стармер.

Политико пишува дека заедничката прес-конференција ќе биде вистински тест за премиерот. Трамп, познат по својата непредвидливост и склоност да ги истакнува победниците, би можел да го промени тонот доколку британската страна покаже знаци на слабост.

Од друга страна, опкружувањето на Трамп инсистира дека скандалите што го тресат Лондон се „непотребна бучава“ што не треба да влијае на билатералните односи. Сепак, британските претставници признаваат дека посетата е обележана со чувствителни моменти и бара дополнителна дипломатска претпазливост.

Трамп и неговата сопруга Меланија веќе присуствуваа на преглед на почесната гарда во друштво на кралот Чарлс III, а се очекува разговорите за трговијата и безбедноста да продолжат во наредните денови.