Специјалците ќе добијат тренинзи за борба против тероризам

Министерот за внатрешни работи, Панче Тошковски, денеска се обрати на втората заедничка седница на владите на Македонија и Унгарија, при што истакна дека веќе се реализираат плановите и заклучоците од минатогодишната средба во Охрид.

„Врз основа на потпишаниот меморандум за соработка меѓу Центарот за обука на МВР и унгарското полициско училиште, очекуваме интензивна соработка во обуката на полициските службеници. Планираме оваа иницијатива да прерасне во Регионална асоцијација на центри за обука, која ќе биде темел на современото полициско работење и професионализација на полициите од регионот“, изјави Тошковски.

Тој додаде дека на билатералната средба со министерот за внатрешни работи на Унгарија, Шандор Пинтер, било договорено потпишување на нов меморандум за соработка во областа на заеднички обуки за единиците за посебни полициски операции, борба против тероризмот и обезбедување личности и објекти. „Очекуваме меморандумот да биде потпишан во втората половина на 2025 година“, нагласи Тошковски.

- Advertisement -

Во рамките на посетата, министерот Тошковски утринава одржа состанок со заменик-министерот за надворешни работи и трговија на Унгарија, Маѓар Левенте, во присуство на претставници од унгарската бизнис-заедница. На средбата се дискутираа конкретни иницијативи за унапредување на економската соработка.

„Светот влегува во нов поредок со предизвици за суверенитетот и интегритетот на нациите, како и за човековите права и слободи. Ова уште повеќе ја засилува потребата од соработка, меѓусебно разбирање и помош за да останеме свои на своето“, истакна Тошковски.