Советот на Европа испраќа набљудувачка мисија за локалните избори во Србија

Делегација од Конгресот на локални и регионални власти на Советот на Европа ќе ја посети Србија од 26 до 30 март за да ги набљудува локалните избори во 10 општини во Србија, кои ќе се одржат на 29 март.

„На денот на изборите, шест тима од Конгресот ќе бидат распоредени, по случаен избор, за да ги следат изборните процедури на гласачките места“, соопшти институцијата.

Делегацијата ќе се сретне со претставници на Министерството за јавна администрација и локална самоуправа, Републичката изборна комисија на Србија, Агенцијата за борба против корупцијата и дипломатскиот кор. Исто така, ќе организира панел дискусии со Постојаната конференција на градови и општини, претставници на медиумите и невладините организации, како и брифинзи со кандидатите и политичките партии што учествуваат на изборите, се вели во соопштението.