Силен земјотрес во Косово, почувствуван во регионот

Топ Вести - Слушај сега

Силен земјотрес со јачина помеѓу 4,8 и 4,9 степени според Рихтеровата скала го погоди Косово во вторник вечерта, со епицентар во поширокото подрачје на Призрен, соопштија властите. Засега нема информации за евентуална материјална штета.

- Advertisement -

Според прелиминарните податоци од Републичкиот хидрометеоролошки институт на Србија, јачината на земјотресот била 4,8, додека Евро-медитеранскиот сеизмолошки центар (EMSC) објави дека земјотресот имал јачина од 4,9 степени според Рихтеровата скала, на длабочина од пет километри, околу 22 километри источно од Призрен, објавува Косово Онлајн.

Треморот бил почувствуван во неколку градови во Косово, вклучувајќи ги Северна Митровица, Лепосавиќ, Грачаница и Штрпце, како и во регионот; во Северна Македонија, Албанија и Црна Гора.

Косовскиот геолошки завод објави дека станува збор за сеизмичка активност што може да го загрози населението и да предизвика материјална штета, истакнувајќи дека сеизмогениот појас на Призрен е активна област.

Директорот на Сеизмолошкиот институт, Шемси Мустафа, изјави дека станува збор за земјотрес со средна јачина кој предизвикал вознемиреност кај граѓаните.

„Земјотресот бил со јачина од 4,8 степени според Рихтеровата скала, со епицентар источно од Призрен. Косово е сеизмичко подрачје и во одредени зони се можни посилни земјотреси, до 6,5 степени според Рихтеровата скала“, рече Мустафа.