Шверцерите не мируваат, но Царината открива сѐ

Царинската управа продолжува со успешна пресретнувачка акција против шверцот и нелегалните активности на граничните премини и аеродромите низ Македонија. Само во последниот извештај, запленети се разновидни производи: дрога, брендирана облека, цигари, играчки, пари, па дури и тројца мигранти кои се обиделе илегално да влезат во државата.

Интересен случај се случил на Меѓународниот Аеродром Скопје, каде мобилен царински тим открил 14 семки од канабис и епрувета со масло од канабис, скриени во чорап, ранец и дуксер на американски државјанин.

„Сомневањето кај службениците доведе до детална контрола, по што беше откриен обид за шверц на канабис”, соопштија од Царината. Случајот е предаден на Основното јавно обвинителство, а супстанците се конфискувани.

- Advertisement -

Во друг случај на аеродромот, цариниците спречиле шверц на 400 парчиња женска долна и ноќна облека со лого на „Викторија Сикрет“ и „Гучи“. Патникот, кој се определил за зелениот канал, очигледно се обидел да ја внесе брендираната стока без пријава. Контролата на неговиот багаж открила вистинска модна архива.

850 парчиња играчки, слушалки, држачи за телефони и привезоци, со логоа на заштитени трговски марки, биле запленети од пратка пристигната од Кина. Царинската служба укажа на основано сомневање за фалсификување и повреда на права од интелектуална сопственост.

Во друга акција, три илјади парчиња цигари и еден килограм тутун биле откриени кај патник кој патувал за Лондон. Во друг случај во кабината на камион со цистерна, под тапацирот на фиока, цариниците на граничниот премин Богородица пронашле 11 штеки цигари.

Меѓу највпечатливите случаи е и заплената на музички инструменти и електроника во вредност од над 700.000 денари. Во комбе со швајцарски таблички, цариниците на Табановце откриле 5 музички инструменти, перална и компјутерски монитор. Во друг случај на истата граница, во автомобил од Холандија, пронајдена е скапа аудио опрема. Дополнително, електрични тапани и „Roland“ аудио опрема биле откриени во торбите на патник од Брисел.

На Табановце, два обиди за внес на вкупно 21.000 евра нелегално беа пресечени. На едниот патник му биле пронајдени 19.600 евра, а на други двајца 31.400 евра.

„Согласно законот, вративме по 10.000 евра на секој, а останатите ги задржавме“, информираа од Царинската управа.

На истиот граничен премин, мобилна скенерска единица детектирала 105 парчиња брендирана облека и обувки, скриени во камион што бил пријавен како празен. Исто така, автомобилска опрема вредна над 100.000 денари била пронајдена скриена во друг камион со бугарски таблички.

Конечно, цариниците на Блаце спречиле обид за шверц на 20 автомобилски делови за „Хјундаи“, уште еден случај на шверц делови кои најчесто завршуваат на сивиот пазар.

Покрај стоката, се бележат и општествени безбедносни ризици. На граничниот премин Богородица, бил спречен нелегален влез на тројца мигранти од Египет, скриени во просторот за палети на товарно возило.

„Имигрантите веднаш беа предадени на МВР за понатамошна постапка“, соопштија од Царина.