Иако никој не може со сигурност да предвиди дали претстојната зима ќе донесе идентични услови, експертите ја нагласуваат важноста на следењето на поларниот вртлог, според анализата на порталот Severe Weather Europe.
Стратосферата над Северниот Пол во моментов е сцена на необичен развој на поларен вртлог, кој би можел значително да влијае на временските обрасци во Соединетите Американски Држави, Канада и Европа во текот на претстојната зимска сезона 2025/2026 година, објавува Večernji list.
Поларниот вртлог, широка зимска циркулација што ја опфаќа Северната хемисфера, покажува необично слаб почеток оваа година. Аномалија на висок притисок на страната на Пацификот го поместува вртлогот подалеку од центарот и го ограничува неговото зајакнување, што резултира со подинамични и нестабилни временски модели. Експертите предупредуваат дека оваа ситуација ја зголемува веројатноста за постудено и потенцијално поснежно време во делови од Европа и Северна Америка.
Во стратосферата се гледа „циклон“ со ладно јадро, но исто така и аномалија на висок притисок што ја нарушува нејзината структура. Ова нарушување се пренесува на долните слоеви на атмосферата, предизвикувајќи формирање на област со низок притисок над источните делови на САД, Тихиот Океан и Европа. Овој модел овозможува транспорт на постуден воздух кон југ, што, особено кон крајот на ноември или декември, може да донесе вистински зимски услови, вклучително и снег.
Според прогнозите на моделот GEFS, се очекува нарушувањето на поларниот вртлог да продолжи во текот на октомври и ноември. Температурните аномалии покажуваат постудени услови во источниот дел на САД и делови од Европа, додека западните делови на Канада ќе останат под влијание на потоплиот воздух поради системот со висок притисок. Сличен модел беше забележан во текот на зимата 1981/1982 година, кога студените воздушни маси значително влијаеја на Северна Америка и Европа.
Иако никој не може со сигурност да предвиди дали претстојната зима ќе донесе идентични услови, експертите ја нагласуваат важноста на следењето на поларниот вртлог. Силен вртлог обично значи поблаги услови бидејќи го задржува студениот воздух во Арктичкиот круг, додека послаб вртлог, како сегашниот, му овозможува на студениот воздух да навлезе во средните географски широчини. Ако сакате вистинско зимско време со студ и снег, сегашниот развој на поларниот вртлог би можел да биде добра вест.
