Германскиот канцелар Олаф Шолц изјави денеска дека е „погрешно и опасно“ американскиот претседател Доналд Трамп да го нарече украинскиот претседател Володимир Зеленски „диктатор“, пишува германскиот весник „Шпигел“.
– Едноставно е погрешно и опасно да се негира демократскиот легитимитет на претседателот Зеленски – рекол Шолц во интервју за весникот.
Тој додаде дека Володимир Зеленски е избран за шеф на државата Украина.
– Фактот дека не може да се одржат регуларни избори среде војна е во согласност со украинскиот устав и изборните закони. Никој не треба да тврди поинаку – рече Шолц.
Американскиот претседател Доналд Трамп денеска го нарече украинскиот претседател Володимир Зеленски „диктатор без избори“, откако тој оцени дека Трамп бил под влијание на руски дезинформации во неговите напори да стави крај на руско-украинската војна, но под услови за кои Киев вели дека се премногу поволни за Москва.
Украинскиот претседател Володимир Зеленски вечерва на Телеграм напиша дека мирот во Украина може да биде посигурен ако се постигне со помош на Америка и Европа.
Зеленски не го спомна директно Трамп за време на неговото редовно вечерно обраќање до украинскиот народ, туку се фокусираше на утрешната средба со американскиот претставник за Русија и Украина, Кит Келог.
– Нашата средба со генералот Келог е закажана за утре и за нас е многу важно средбата и воопшто соработката со Америка да биде конструктивна – рече тој.
