Истрагата по еден од најдрските грабежи во легендарниот париски музеј Лувр откри шокантен безбедносен пропуст – лозинката за системот за видеонадзор била, ни повеќе ни помалку, Лувр.
Францускиот весник Либерасион објави дека ревизиите на безбедносните системи на музејот откриле очигледни и загрижувачки проблеми. Една таква ревизија, спроведена во 2014 година од страна на француската национална агенција за сајбер-безбедност, покажала дека лозинката за пристап до видеонадзорот на музејот навистина била Лувр, што е само еден чекор над класичната лозинка „пасворд“.
Последователните проверки, исто така, открија „сериозни недостатоци“ во системите на музејот. Меѓу нив се лесниот пристап до покривите за време на градежните работи и безбедносниот софтвер стар повеќе од две децении, кој производителот повеќе не го поддржува. Секој што работел во канцеларија со стар компјутер со Виндоус 98 може да замисли за што се работи.
Во моментов не е познато точно кои фактори придонеле за безбедносните пропусти што го овозможиле грабежот, иако десетици луѓе работат на истрагата. Грабежот се случи во ден недела во 9:30 часот наутро, во работното време на музејот. Помал камион со механичка скала бил паркиран до зградата, а четворица осомничени влегле во галеријата на вториот кат, користејќи електрични алатки.
Иако им се заканиле на чуварите и на посетителите, никој не бил повреден. Крадците го напуштиле музејот за само 4 минути и избегале низ улиците на Париз. Целата кражба траела само 8 минути.
Многу е кажано за безбедноста на музејот, но досега нема индикации дека системот за видеонадзор бил компромитиран или нефункционален на денот на грабежот.
Досега 4 лица се уапсени и обвинети за спектакуларната кража. Скапоцените камења и накитот, чија вредност се проценува на десетици милиони долари, сè уште не се пронајдени.
Низ историјата, Лувр бил цел на бројни грабежи, вклучувајќи ја и познатата кражба на сликата Мона Лиза во 1911 година. Последниот голем грабеж во музејот пред овој се случи во 1998 година.
